Mariette en Mart-Marie gesels openhartig oor die soet en die seer van ma-en-dogterverhoudings: kommunikasiekwessies, rebelsheid, kwesbaarheid, goed genoeg wees, aanvaarding en ‘magic’. Hierdie episode word opgedra aan elke ma en dogter.

Is alle mense bo 65 één ouderdom: oud? Behels ouer word die een verlies op die ander, of is dit ‘n terrein wat ons vars kan verken? Dr. Johan Myburg praat oor vooropgestelde idees, hoe om jou beeld van jouself en jou werklikheid oop-oog te benader, sinvolle gesprekke en “aanhou beweeg en geraas maak.” Inhoud geborg.

Kan dit wees dat élkeen van ons kreatief is en ons skeppendheid deur speelsheid kan herontdek? RSG-programbestuurder en kreatiwiteitsafrigter Kobus Burger verduidelik hoe om struikelblokke in ons pad te systap, vergete drome te herwin, en op moontlikheidsdenke te fokus. Hy gee praktiese wenke om kreatiwiteit maklik en vinnig in ons lewens in te sluit.

Het jy al met ‘n knievervanging, heupvervanging of gordelroos te doen gekry? Vermaaklikheidsjoernalis Martjie Roos deel haar pad hiermee: die fisieke en emosionele uitdagings, erge pyn, inperking van haar daaglikse funksionering, onafhanklikheid en selfvertroue - maar ook hoe haar geloof en die liefde van vriende en familie haar dra.

Tydens grendeltyd het die digter Carina van der Walt, ver van haar land en mense, die “skoonheid van verval” ontdek. Dié manier van kyk, vergestalt in die Japannese lewenshouding Wabi Sabi, het haar aangespoor om foto’s te neem van die eenvoudige gawes van haar tuin en kombuis en om dit vars te interpreteer. Carina deel haar insigte én vertel van ’n tweede liefde, tuine, blomsimboliek, en die betekenis van kruie en vrugte wat in ’n bak op ’n kombuistafel verdroog. Inhoud geborg.

Hoewel die persepsie dat maer wees gelyk is aan mooi wees toenemend vervaag, bly gewigsverlies om gesondheids- en ander redes vir baie mense belangrik. Opvoedkundige sielkundige Karin Bronkhorst praat oor die verband tussen emosies en eetpatrone, wanneer ‘n gebrek aan selfbeheersing geen rol speel nie, wat hipnoterapie behels en hoe die behandeling van kwessies soos trauma tot gesonder gedragspatrone kan lei.

Een ding staan vas: niks bly soos dit is nie – veral wanneer ‘n pandemie die wêreld tref. Baie van ons moes emosionele, finansiële, gesondheidsverwante of ander terugslae die hoof bied en probeer steeds ons balans herwin. Wat bepaal of ons weer opstaan, of bly lê? Ilse Salzwedel gesels oor Floreer, ‘n praktiese gids met aangrypende verhale en duidelike riglyne oor hoe om ‘n betroubare hulpbron te ontwikkel: veerkragtigheid.

Wat is die positiewe sielkunde, en watter voordeel kan jy daaruit trek? Dr. Wilmien Human, kliniese sielkundige en senior dosent, praat oor praktiese maniere om algaande gelukkiger te leef. Navorsingsresultate wys dat hulpmiddels soos ‘n dankbaarheidsjoernaal op die lang duur stres kan verminder en ons fisieke gesondheid, immuunstelsel, verhoudings en vlak van tevredenheid ‘n hupstoot kan gee.

Die verlies van ‘n lewensmaat, ouer word, die stryd om oorlewing en ‘n pynlike siektetoestand kán met grasie hanteer word. Marina Beukes, besigheidsvrou en maatskaplike werker, deel haar inspirerende benadering.

Voel dit soms of jy net gee en gee? Die begrippe “other-centeredness” en “adult child” is dalk op jou van toepassing. Dié insigte en selfsorgwenke kan uitbranding voorkom.

Gooi die mense om jou se fisieke of emosionele swaarkry jou van balans? Put groepe jou uit? Ooreet jy om emosionele stres hok te slaan? Lees ‘n Amerikaanse psigiater se siening oor empate se besonderse eienskappe en haar wenke rakende hul uitdagings, verhouding met kos, en romantiese verbintenisse.

Brain Harmonics is ‘n vorm van EEG-bioterugvoer wat jou brein leer om die mees toepaslike breingolwe te vervaardig. Dit kan volwassenes én kinders help om ongewensde toestande te verlig, prestasie te verbeter, slegte gewoontes af te skud en lewensgehalte te verhoog. Hoe werk neuroterapie? Hoekom het ons dit nodig? Is dit veilig?

Ons fokus dikwels eerder op ons uitkomsgerigte linkerbreinkant, wat alles wat ons doen evalueer pleks van op ons intuïtiewe regterbreinkant, wat nie omgee of iets reg of verkeerd is nie. Voorligtingsielkundige Eleen Polson verduidelik hoe jy jou skeppende self deur klank, beweging of proseskuns kan stimuleer.